ISANG lider ng kulto ang pinaghahanap ng awtoridad matapos umanong halayin ang mga birheng miyembro na hinihikayat ibigay ang katawan kapalit ng pag-akyat umano sa langit. Isa sa mga biktima ang nabuntis pa umano matapos ang kanilang ‘spiritual mission’.
Gayunpaman, ibang langit pala ang tinutukoy ng suspect na kinilalang isang Teodoro Ferriol alyas Master Doring na itinuturong paulit-ulit na gumahasa sa pitong dalaga sa lalawigan ng Cebu. Bagama’t naisampa na ang kasong rape sa Cebu Provincial Prosecutors Ofice laban sa suspek na lider umano ng kultong Higawnon, patuloy pa rin ang manhunt operation kay Ferriol na ayon sa mga biktima ay niyakag sila para maging bahagi ng tinatawag na “spiritual mission.”
Batay sa salaysay ng isa sa mga biktima kay agent-on-case Agapito Gierran ng National Bureau of Investigation (NBI), inatasan silang manatili sa loob ng temple ng ilang gabi bilang bahagi pagsubok sa katapatan.
Dito na umano naganap ang paulit-ulit na panghahalay ng suspect – na humantong pa sa pagkabuntis ng isa sa pitong biktima.
Babala ng NBI sa publiko, maging mapanuri sa mga sinasapiang sekta. Kamakailan lang, sumambulat ang balita kaugnay ng kasong sex trafficking na isinampa ng US Federal Prosecutors Office laban sa kilalang kaibigan ng Pangulo – si Pastor Apollo Quiboloy ng Kingdom of Jesus Christ (KOJC).
Sa salaysay ng mga biktima, pinupwersa umano silang makipagtalik ni Quiboloy na makipagtalik sa kanilang “banal na lider,” kasabay ng pananakit at pananakot na hindi umano sila tatanggapin sa langit kung hindi tatalima.
