KINIKILALA na ngayon ang lakas ng partylist sa Kamara de Representantes.
Malaki na ang pakinabang ng mga kongresistang pulitiko sa mga kinatawan ng partylist dahil pare-pareho naman silang mga pulitiko.
Katunayan, karamihan sa kanila ay tradisyunal na pulitiko (trapo).
Sa kasalukuyang Kamara, mayroon pa ngang mga kongresista mula partylist na pinuno ng mga komite at higit sa lahat deputy speaker tulad nina Rep. Eddie Villanueva, Representative Rodante Marcoleta, Representative Jose “Lito” Atienza at Representative Bernadeth Herrera.
Maliban sa mga kongresista ng mga partylist ng kaliwa tulad ng Bayan Muna, Gabriela, ACT – Teachers, Kabataan, wala na akong nalalamang partylist na totoong nagsusulong at nakikipaglaban para sa interes, kagalingan at buhay ng mga api at mahihirap sa lipunang Pilipino.
Ang mga partylist ng kaliwang puwersa ay pinagbuklod sa pangkat na tinawag nilang Makabayan Bloc.
Sa eleksyong magaganap sa Mayo 9, 2022, nabatid kong nadagdagan ang mga partylist na sumali sa nasabing pampulitikang aktibidad.
Lahat sila ay mayroong sektor o grupo ng mamamayan na kakatawanin sa Kamara. Ngunit, kung susuriin at pag-aaralang mabuti ay matutuklasang partido pala ng mga pulitiko, dating opisyal ng pamahalaan at ilang ambisyosong artista.
Kahit ang sektor ng mga tsuper ng pampublikong transportasyon, manggagawa rito sa bansa at mga manggagawa sa ibang bansa ay ginamit na batayan upang magkaroon ng mga partylist ang mga pulitiko.
Ang notoryus sa kanila ay ang mga kilalang beteranong pulitiko na biglang nagtayo ng partylist ng mga api at mahihirap, samantalang saksakan ng yaman ng nasabing pulitiko.
Hindi ‘yan labag sa batas ng partylist, ayon sa desisyon ng Korte Suprema. Walang magawa ang mga botante kundi ihalal na lamang ang partidong sa tingin nila ay kanilang maaasahan, malalapitan at nahihingan ng tulong kapag nanalo sa halalan.
metrosundaily
