PINAULANAN ng bala ng isang armadong lalaki ang dalawang bahay sa Barangay Tarusanan, Milaor, Camarines Sur kung saan lima katao ang patay, Biyernes ng hapon.
Kinilala ang mga nasawi na sina Romeo de Leon, 72, dalawa nitong apo na edad 6 at 4, kapitbahay niyang si Samuel Cobilla, 21, at isang 7-taong gulang na bata.
Isa pang menor de edad ang nasugatan sa insidente.
Ayon kay Capt. Rosalinda Moises, hepe ng Milaor Municipal Police Station, nasa loob ng bahay ang mga biktima nang biglang dumating ang suspek at pinagbabaril ang mga ito gamit ang isang M16.
Unang pinasok ang bahay ng pamilya De Leon at sinunod ang kapitbahay kung saan may hinagis pang granada.
Patuloy na pinaghahanap pa ang suspek na ayon sa pulisya ay kaanak ng mga biktima.
Alitan sa lupa ang tinitingnang motibo ng suspek sa krimen, ayon sa pulisya.
metrosundaily
