SA gitna ng pagiging abala ng Pangulo sa hamong dala ng nakamamatay na mikrobyo, tila hindi na namalayan ng Palasyo ang pamamayagpag ng isang malaking sindikatong nakapambibiktima gamit ang pangalan ng punong ehekutibo.
‘Yan mismo ang napag-alaman ng pamahalaang bayan ng Angono na mas kilala sa mga alagad ng sining sa likod ng mga obra maestrang dibuho.
Sa nakabibighaning bahagi ng Angono namayagpag ang FSRC Land Development Corporation na umaangkin sa mga lupang titulado.
Ang diskarte ng grupo, gumamit ng mga pinekeng dokumento mula sa Palasyo, sukdulang pwersahin ang mga taong munisipyo para maglabas ng mga dokumentong patungol sa assessment at tax declaration na gagamitin sa kanilang panloloko.
Ang siste, hindi madaling mapaniwala ang mga mapanuring taong munisipyo. Sa halip na masindak, pinili ng Angono LGU na magberipika sa paandar ng sindikato.
Ang resulta – tama ang kanilang hinala. Ang nagpapanggap na lehitimong negosyo, isa palang manggagantso.
Hindi kanila ang lupa sa maalindog na Barangay Mahabang Parang kung saan libo-libong pamilya ang nananahan.
Ang masaklap, marami na ang nasilat. Perang pinaghirapan, nakuha na pala ng mga kawatan.
Bukod sa FSRC, may dalawang grupo pa ng manggagantso – ang Daup Palad Foundation at mag-asawang kilala sa pangalang Guido.
Pero iba ang diskarte ng Daup Palad Foundation. Kanilang bungad, dangkal-dangkal na pekeng titulo.
At ang mag-asawang Guido? Kanila daw ang Hacienda de Guido na bumabagtas sa mga bayan ng Cardona, Binangonan Taytay at Angono.
Ang totoo, maraming kumakagat sa patibong ng mga naturang sindikato. Dangan naman kasi pahirap ang proseso ng gobyerno sa murang pabahay para sa pamilyang Pilipino.
Ang solusyon – ipasa sa LGUs ang poder sa mga programang pabahay lalo pa’t sila naman ang nakakabatid kung alin sa mga umaangkin ang peke at tunay.
Pero teka, hindi sapat ang puro pangangasiwa ng problema, marapat lang pati pondo sa kanila ipamahala, kalakip na mahigpit na pagsusuri ng Commission on Audit at iba pang ahensyang mandato’y murang pabahay para sa mga maralita.
