ISA si Pangulong Rodrigo Duterte sa mga kandidato sa pagkasenador sa halalang magaganap sa susunod na taon.
Ang dahilang binanggit ni Duterte sa kanyang pagtakbo ay upang ayusin daw ang maling ginagawa ng mga senador sa pag-iimbestiga o pagtatanong sa mga opisyal ng pamahalaan.
Naniniwala ang Pangulo na abusado raw ang mga senador dahil ipinapahiya ng mga ito ang mga opisyal ng iba’t ibang kagawaran at ahensiya ng pamahalaan na nakasalang sa imbestigasyon ng Senado.
Dapat daw hindi pinupuwersa ng mga senador ang mga opisyal ng pamahalaan na isinasalang sa imbestigasyon.
Posibleng manalo
Kung maisasalin sa boto ang pananatili ng kanyang popularidad sa mga Pilipino, posibleng manalo pa rin si Duterte sa eleksyon sa Mayo 9.
Kung magwawagi, makakasama niya ang kanyang mga ‘bataan’ na sina Senador Christopher Lawrence “Bong” Go at Senador Ronald “Bato” dela Rosa. Makakasama rin niya ang kanyang mga kaaway na sina Senador Richard Gordon, Senadora Leila de Lima at dating Senador Antonio Trillanes IV kung mananalo ang tatlong ito.
Kaya, magandang panoorin ang Senado sa susunod na anim na taon mula 2022 hanggang 2028 dahil makikita natin kung paanong mag-uusap, magpapalitan ng mga ideya at kung ano ang mangyayari kapag makipagdebate ang pangkat nina ‘Senador’ Duterte, Go at Dela Rosa sa tropa nina Gordon, De Lima at Trillanes. Kapag manalo si Duterte, pihadong mabibigo siyang ‘disiplinahin’ ang mga senador sa gusto niyang dapat ikilos at gawin ng mga senador, sapagkat noong minsang maging kongresista si Duterte ay hindi naman niya narendahan ang mga imbestigasyon at diskarte ng mga kasapi ng mababang kapulungan ng Kongreso.
Mga opisyal na pamahalaan hindi napatino
Simula nang maging Pangulo siya ng bansa noong Hunyo 30, 2016 ay hindi nga niya napatino ang mga opisyal ng pamahalaan hinggil sa paghawak at pangangasiwa ng pera ng kani-kanilang tanggapan.
Hindi nga napatigil ni Duterte ang mga korap na opisyal at kawani ng iba’t ibang kagawaran at ahensiya ng pamahalaan mula sa pangungurakot.
Katunayan, hanggang kasalukuyan ay patuloy sa pangungulimbat ang mga korap sa gobyerno tulad sa Department of Public Works and Highways (DPWH), Department of Health (DOH), Department of Agriculture (DA), Bureau of Customs (BOC), Bureau of Immigration (BI), Philippine National Police (PNP), Bureay of Jail Management and Penology (BJMP), Bureau of Corrections (BuCor) at iba pa.
Senado pa kaya na maliit lang kung ikukumpara sa buong burukrasya? Kung nabigo si Duterte sa sangkaterbang ipinangako na kanyang babaguhin kapag naging pangulo siya ng bansa ay hindi nakapagtatakang mabibigo rin siyang baguhin ang Senado.
Hindi uubra sa kapwa senador
Kahit matapang at mahilig siyang magmura, siguradong hindi ‘yan uubra sa mga senador dahil mayroon din silang sariling tapang at siyempre marunong din silang magmura at magalit.
Higit na kapani-paniwala kung ang sasabihin ni Duterte na rason sa kanyang pagtakbo sa pagkasenador ay upang manatili sa pamahalaan, samakatuwid, manatili sa kapangyarihan.
