Isa lamang si Rolando Baniqued sa napakaraming bumbero nasawi sa pagtupad ng Tungkulin. (Larawan mula sa Vera Files)
Ni Tracy Cabrera
HABANG patuloy na umaasa ang bayan sa katapangan at malasakit ng ating mga first responder—ang mga bumbero, rescuer at volunteer—sa oras ng sakuna o kalamidad, lalong lumalakas ang panawagan para sa mas mahusay na suporta at pagkilala sa serbisyo ng ating mga unang tagapagligtas.
Kamakailan, isang boluntaryong hepe ng mga firefighter volunteer ang nasawi sa pagtupad ng kanyang tungkulin na iligtas ang lahat ng uri ng banta sa buhay at kaligtasan.
“Ang sakripisyo ni Rodolfo Baniqued ay hindi lamang nagpakita ng panganib na kinakaharap ng mga boluntaryong bumbero, kundi nagsilbi ring mitsa ng isang mas matibay na kilusan para sa pagbabago—isang laban na ipinangakong ipagpapatuloy namin sa bawat hakbang,” tinukoy ni Ang Bumbero ng Pilipinas party-list president at party-list first nominee Dr. Jose Antonio ‘Ka Pep’ Goitia.
Sa burol na ginanap noong Martes ng gabi para kay Rodolfo Baniqued, isang 52-anyos na boluntaryong hepe ng bumbero, personal na nagbigay-pugay si Dr. Goitia upang mangako ring magbibigay siya ng buong suporta sa lahat ng mga unang rumeresponde, tagapagligtas ng sunog at mga boluntaryo sakaling makakuha siya at ng kanyang kasamahan nominado ng puwesto sa Mababang Kapulungan.
Dumiretso mula sa isang fashion event, na kung saan nakasama si First Lady Liza Araneta-Marcos (FLLAM), na sumusuporta sa mga atletang Pilipino, tiniyak ni Goitia sa pamilya ni Baniqued na hindi masasayang ang kanyang sakripisyo, bagkus ang kanyang kabayanihan ay magsisilbing inspirasyon sa kanilang grupo upang itulak ang mga kinakailangang reporma sa sektor ng serbisyong pamatay-sunog.
Ayon sa first nominee ng ABP, nakabuo na sila ng mga konkretong plano upang maisakatuparan ang kanilang adbokasiya na ‘Para sa Mas Ligtas na Pinas’.
Bilang nag-iisang partylist na kumakatawan sa mga boluntaryong bumbero at tagapagligtas, prayoridad din nila ang pagpasa ng Firefighters’ Welfare Act, na naglalayong itaas ang sahod, hazard pay at mga benepisyong pangkalusugan ng lahat ng mga boluntaryong first responder.
“Bukod d’yan, kasama rin sa aming isinusulong ang Fire Equipment Modernization Bill, na magbibigay ng pondo para sa mga makabagong kagamitan sa pagsugpo ng sunog. Kailangan ding isulong ang Community-Based Fire Prevention Program upang sanayin ang mga komunidad at mapahusay ang paghahanda laban sa mga sakuna.
