INULAN ng reklamo ang isa sa pinakamalaking commercial bank sa bansa makaraang mawala ang perang nakalagak sa kanilang mga personal bank accounts.
Kinumpirma naman agad ng Bangko Sentral ng Pilipinas (BSP) ang nasabing kaganapan kasabay ng pagtitiyak na patuloy nilang tinututukan at tinutunton ang mga salarin sa likod ng online nakawan ng pera ng mga depositors ng BDO Unibank na pag-aari SM Group ng bilyonaryong pamilya Sy.
Ayon kay BSP Governor Benjamin Diokno, nakikipag-ugnayan na ang kanilang tanggapan sa BDO Unibank kaugnay ng hacking sa banking system ng nasabing kumpanya.
“BSP will do everything to ensure the safety and integrity of the financial system as well as the protection of financial consumers,” tugon ni Diokno sa mamamahayag.
Sa pahayag ng BSP, inulan ng reklamo ang BDO Unibank (ang pinakamalaking bangko sa Pilipinas) mula sa mga depositors makaraang maglaho ang kanilang deposito sa nasabing bangko. Sa tala ng BSP, lumalabas na naglalaro sa P25,000 hanggang P50,000 ang natangay ng mga online kawatan sa bawat dumulog sa nasabing ahensya.
Nang imbestigahan, nabatid na ang mga nawalang pera ay nalipat sa mga accounts sa isa pang commercial bank – sa Union Bank.
“The BSP is in close coordination with BDO as well as UBP on this incident to ensure that remedial measures are being undertaken, including reimbursement of affected consumers,” saad ng kalatas ni Diokno.
“Rest assured that we continue to collaborate and engage (with) stakeholders,” dagdag pa ng opisyal kasabay ng pagtitiyak na poprotektahan nila ang mga depositors laban sa aniya’y “cyber-related crimes” tulad ng “phishing, SMiShing” at iba pang ipinagbabawal na transaksyon.
Ayon naman sa pamunuan ng BDO, kakarguhin nila umano ang mga nawalang salapi sa kanilang mga depositors.
“We will keep the affected innocent customers whole for their losses,” ani BDP Unibank chair Teresita Sy-Coson.
metrosundaily
