DININIG ang panalangin ng mga Caviteño makaraang matagpuang buhay habang nakagapos naman ang kamay ng parish priest ng Most Holy Rosary Parish Church na nawala noong Biyernes ng umaga.
Hindi pa halos makapagsalita si Rev. Phem Octavo Peregrino, 58, nang matagpuan ito at ang kanyang sasakyang puting Mitsubishi Adventure sa Barangay Lumil, Silang, Cavite, tanghali ng Linggo.
Agad na dumulog sa himpilan ng pulisya ang kapatid nitong si Joel Peregrino matapos mawala ang paring kapatid ng halos dalawang araw.
Matatandaan na nagpaalam ang pari bandang alas-9:30 ng umaga noong Biyernes na bibili siya ng kandila ngunit mula noon ay hindi na ito nakabalik pa.
Araw na ng Linggo ng matagpuan ng mga residente ng Silang, Cavite ang nawawalang pari at ang kanyang sasakyan.
Inaalam na ng mga awtoridad ang pangyayari sa likod ng pagkawala nito habang nagpapagamot pa sa ospital ang pari dahil nasa state of shock pa ito.
