INIUTOS na ng Department of Social Welfare and Development (DSWD) ang pagbawi sa mga de lata na ipinamamahagi sa mga taong apektado ng oil spill sa Oriental Mindoro dulot ng paglubog ng tanker Princess Empress.
Kabilang umano ang mga de lata sa tulong na food packs sa mga apektadong residente.
Sinabi ng mga residente na may kakaibang amoy at lasa ang de lata na tuna.
Gawa umano ito sa hindi kilalang manufacturer at sa hitsura pa lamang umano ay malabsa na ito at amoy bulok. Maalat umano ang tuna at maging ang pusa ay nasuka nang tinangkang ipakain dito.
Iniutos na ni DSWD Secretary Rex Gatchalian sa Central Office na makipagkoordinasyon sa supplier at pag-aralan ang susunod na hakbang.
Gayunman, sinabi ng DSWD na hindi expired ang mga de lata.
Iniutos na rin ng mga opisyal sa lugar na ihinto ang pamimigay ng food packs galing sa DSWD.
metrosundaily
