KASONG parricide ang haharapin ng 25-anyos na nanay matapos nitong patayin sa sakal ang 2-anyos na anak habang umano’y high sa droga sa Bacoor, Cavite.
Martes ng umaga nang madiskubre ng tatay ang wala nang buhay na anak. Galing umano ito sa trabaho nang makitang patay na ang anak. Sinabi sa report na may mga pasa rin ang mga braso ng bata na halos buto’t balat na.
Itinuro ng anim na taong gulang na anak ang mismong nanay na sinasabing gumawa ng krimen. Hinihinalaang lango sa droga ang nanay nang patayin ang biktima.
Pati rin umano ang ama ng biktima ay gumagamit ng ilegal na droga.
“Doon sa tatay, gumagamit sila, nagja-jamming,” ani Maj. Renalyn Lim ng Bacoor police.
Arestado ang ina ng bata, na lagi umanong tulala at tila hindi alam ang nagawang krimen.
Halos buto’t balat na rin at may mga sakit ang tatlong iba pang anak ng suspek. Ang pinakabata rito ay tatlong buwang gulang.
Ayon sa mga kamag-anak, ginugutom at minamaltrato ng ina ang sariling mga anak, lalo kapag lulong sa droga.
“‘Yong mga bata hindi niya napapakain… ‘Yong panganay at pangalawa, binubugbog niya, siguro naririndi siya,” sabi ng pinsan ng biktima.
Ilang taon na ang nakakaraan nang mamatay din ang anak na sanggol ng suspek matapos umanong aksidenteng matakpan ng unan habang pinapadede.
metrosundaily
