NAKIKIDALAMHATI ang OFW party-list sa pagkamatay ng tatlong kababayan dahil sa sunog sa isang mataong gusali sa Mangaf, Kuwait.
Dalawa pang Pinoy worker ang nasa kritikal na kondisyon.
“Ang kalinga ng ating pamahalaan ay dapat agarang madama ng ating mga OFWs sa ganitong mga pangyayari, kaya’t tayo’y umaasa sa mabilisang aksyon at tulong mula sa ating Embahada sa Kuwait, Department of Migrant Workers, at Overseas Workers Welfare Administration, lalo na sa pagbibigay ng tulong sa pamilya ng mga pumanaw na OFWs, tulong medikal sa mga nasa kritikal ang kondisyon, at sa pansamantalang matitirhan ng mga kababayang biktima ng naging sunog,” ayon kay OFW Party-list Representative Marissa ‘Del Mar’ Magsino.
“Atin ding panawagan ang mas masusing paggabay ng ating mga embahada, konsulado, at migrant workers offices sa ating mga kababayan sa pagsigurong ang mga napipiling tirahan nila sa kanilang host countries ay sumasailalim sa sapat na safety checks. Ang angkop na impormasyon sa building safety checklist sa bawat host country ay makakatulong sa ating mga kababayan, lalo sa sa mga unang beses pa lamang naninirahan sa bansa,” dagdag pa ni Magsino.
Bukas din ang OFW Party-list sa anumang tulong na kakailanganin ng mga naapektuhang OFWs at kanilang mga kapamilya.
“Ating balutin ng dasal ang mga naging biktima ng pangyayari at ipanalangin ang patuloy na kaligtasan ng mga kababayang nagtatrabaho sa ibayong dagat,” ayon pa kay Magsino.
