Ex-PNP chief Azurin hinarang ng immigration officers sa Canada

KINUMPIRMA ngayong Miyerkoles ng Department of Foreign Affairs (DFA) sa pagdinig sa Kamara ang pagharang kay dating National Police Chief general Rodolfo Azurin Jr ng mga tauhan ng immigration sa kanyang pagdating sa Langley airport sa Canada.

Sinagot ni Nueva Ecija Rep. Joseph Violago, sponsor sa panukalang P23 bilyong budget ng DFA para sa 2024, ang tanong ni House Minority Leader Marcelino Libanan sa pagharang kay Azurin.

“Parang nagkaroon ng misinterpretation, misunderstanding sa nangyari and the Canadian government expressed their regrets over the incident,” sabi ni Violago.

“For privacy purposes, hindi pa ma-ididivulge iyong report,” dagdag pa nito.

Agad na lamang boluntaryong umuwi si Azurin matapos ang insidente.

“Wala nang nagawa  ang Philippine Embassy kasi General Azurin voluntarily returned. Kaya wala nang naging assistance about the incident,” dagdag pa ni Violago.

 “General Azurin went to Canada on his private capacity. Since the trip is not official, wala rin pong magagawang assistance just in case,” ayon pa kay Violago.

Ayon sa report, tinanong si Azurin ng mga awtoridad sa Canada tungkol sa drug war sa ilalim noon ng pamumuno ni dating pangulong Rodrigo Duterte.

“This is  the budget season, you have to show Congress that your office is functioning properly. Lahat ba ng former PNP officials ay iintercept sa mga bansang ito at pauuwiin sa ating bansa?” ayon pa kay Libanan.

Hindi pa nag-iisyu ng sagot ang gobyerno ng Canada sa insidente.

“The Canadian government will be the one who will relay the statement to the Philippine Embassy,” ayon pa rito.

Sa pahayag, sinabi ni Azurin na sasabihin niya ang totoong nangyari sa tamang panahon.

“In due time I will issue my statement and face the media to tell [them about] what happened,” sabi nito.