NEGATIBO. Inilabas ng kampo ni presidential candidate Bongbong Marcos ang resulta ng drug test matapos magbigay ng 'blind item' si Pangulong Rodrigo Duterte hinggil sa isang aspirante na gumagamit ng cocaine at mahinang klaseng lider.
KUMASA na panawagang drug test para sa mga aspirante sa nalalapit na halalan si dating Senador Ferdinand “Bongbong” Marcos, bilang tugon sa mga patutsada ni Pangulong Rodrigo Duterte kaugnay ng isang hindi pinangalanang presidential aspirant na umano’y gumagamit ng ipinagbabawal na gamot.
Sa isang pahayag ni Atty. Vic Rodriguez na tumatayong tagapagsalita ng pambato ng Partido Federal ng Pilipinas, isinapubliko ang resulta ng drug test ng dating senador – negatibo, kasabay ng pagsusumite ng dokumentong patunay sa mga tanggapan ng Philippine Drug Enforcement Agency (PDEA), National Bureau of Investigation at maging sa Philippine National Police (PNP) na inatasang mag-imbestiga kaugnay ng nasabing usapin.
Ayon naman kay Marcos, minabuti niyang agad na sumailalim sa drug test dahil batid naman niyang hindi siya ang pinupukol ng Pangulo. “I really don’t feel that I am the one being alluded to. In spite of that, I believe it is my inherent duty as an aspiring public official to assure my fellow Filipinos that I am against illegal drugs,” sambit ni Marcos na nangunguna sa lahat ng political surveys sa bansa.
“This is why I took a cocaine test yesterday and the result was submitted this morning to the Philippine Drug Enforcement Agency (PDEA), the office of the Chief of the PNP (Philippine National Police) and the National Bureau of Investigation. Let me reiterate my assurance to my fellowmen, especially to the supporters of BBM-Sara Uniteam that I am, and will remain, a vigilant anti-illegal drugs campaigner,” dagdag pa niya.
Makaraang isumite ang resulta ng kanyang drug test, nanawagan din ang dating senador sa ibang aspirante na boluntaryong sumailalim sa katulad ng proseso – sa kabila pa ng posisyon ng Supreme Court na una nang nagsabing walang basehan pwersahin ang mga kandidatong magpa-drug test dahil wala naman anila ito sa anumang probisyon sa ilalim ng Saligang Batas.
“I’m calling again all elective aspirants to take the drug test to ensure our people, particularly the young generation, that no elected leader is into illegal substances,” pahabol pa ni Marcos.
Wala namang pahayag ang Palasyo sa hamon ni Marcos sa iba pang aspirante – kabilang si Duterte na una nang umaming gumagamit ng drogang Fentanyl, para sa voluntary drug test.
