Ni Jet D. Antolin
MAS lalo nang lumalim ang alitan sa pagitan ng pamilya Marcos at Duterte matapos utusan ni dating pangulong Rodrigo Duterte ang nasa likod ng peoples initiative na itigil ito kung gusto pang manatili sa Malacanang ni Pangulong Ferdinand ‘Bongbong’ Marcos Jr.
Nagsimula ang bangayan matapos isulong ang pagbabago sa 1987 Constitution na pinaniniwalaan ni Duterte na pakana ni First Lady Liza Araneta-Marcos at House Speaker Martin Romualdez.
Sa ginanap na prayer rally sa Davao City kahapon, Linggo, inupakan ni Duterte ang pagsusulong ng Charter change sa pamamagitan ng People’s Initiative.
Sinabi ni Duterte na walang mali sa kasalukuyang Konstitusyon at maaari na lamang itong amyendahan ang hindi sa lubos na pagbabago nito.
Ayon pa kay Duterte, pinamunuan umano ng House of Representatives ang pagbili ng pirma para mabago ang Konstitusyon.
Tahasan itong itinanggi ni Romualdez.
Hinamon din ni Duterte ang mga sundalo na arestuhin ang mga mambabatas sa umano’y pagwaldas ng pondo ng bayan.
Nagbanta rin si Duterte na ipaaaresto niya ang mga ito sakaling tumakbo sa eleksiyon at manalo.
“Arestuhin ninyo kasi nagsasayang ng pera — fraud swindling ginawa nila. You must account for the wasted money, for the money that you bought the signatures of Filipinos — bribery. Magdasal kayo,” sabi pa ni Duterte sa prayer rally na dinaluhan ng mga kababayan sa Davao City.
“Parliament ang ambisyon niyan. Karamihan galing kay Liza Marcos pati kay Romualdez,” he said. “Mabuti sana kung bright kayo. Eh kung drug addict ka lang naman (Marcos) at may asawa kang hungry for power. Tapos may isa itong taga-Leyte gusto siyang maging prime minister — yan ang plano nila,” ayon pa kay Duterte.
Pinatitigil din ni Duterte ang Pangulo sa Chacha kung ayaw nitong sapitin ang sinapit ng kanyang ama, si dating pangulong Ferdinand Marcos Sr.
“Ako nagmamakaawa kasi it will divide the nation at madugo ang panahong ito,” he said. “Sabi ko sayo Mr. President kaibigan kita. Kapag pinilit mo ito, lalabas ka ng Malacañan kagaya nong panahon na pinalayas kayo… Baka susunod ka sa dinaanan ng tatay mo. Diyan ako takot, ayaw ko mangyari sa ‘yo yan.”
