SA loob ng halos dalawang taon ng pananalasa ng pandemya, aabot sa 1,000 tonelada ng mga medical waste ang nakokolekta ng mga local government units (LGU) kada araw, ayon sa isang opisyal ng Department of Environment and Natural Resources (DENR).
Giit ni DENR Undersecretary Jonas Leones, higit na kailangang palakasin ang pagpapatupad ng Republic Act 9003 (Ecological Solid Waste Management Act of 2000) sa hangaring matugunan ang paglobo ng basurang kinokolekta ng mga LGUs sa kanilang nasasakupan.
“Sa ngayon meron tayong 1,000 metric tons of waste or health care waste kada araw. Napakarami niyan,” saad ni Leones base sa datos na nakalap ng kanyang tanggapan mula sa Environmental Management Bureau (EMB). Aniya, patuloy naman nakikipag-ugnayan ang kagawaran sa mga LGUs para bumalangkas ng isang mekanismong magbibigay katiyakan sa angkop na pangongolekta ng basura nang hindi nalalagay sa alanganin ang buhay ng mga kawaning nakatalaga sa local solid waste concerns.
“Ang ginagawa natin yung mga barangay sila muna ang magkokolekta at nilalagay muna yan sa temporary transfer station. Dun kinukuha ng ating munisipyo yung mga health care waste na ito para dalhin sa treatment facility to sanitize them, bago siya dalhin sa final disposal sites,” dagdag pa ni Leones.
Binigyang diin pa niyang hindi dapat ipagsawalang bahala ang wastong paraan sa pagtatapon ng basura – kabilang ang mga medical waste tulad ng mga facemasks, hiringgilya, testing kits, bulak, disposable PPEs, feminine napkins diaper at iba pa.
Maging ang pagbibiyahe ng basura, dapat din aniyang ingatan hanggang sa maihatid sa treatment facility bago pa man ilagak sa mga sanitary landfills.
Sa ganitong paraan, aniya maprotektahan hindi lang ang kalikasan kundi maging ang kalusugan ng mga mamamayan.
