Cebu City Mayor Rama, 7 iba pang opisyal sinuspinde ng 6 buwan

SUSPENDIDO si Cebu City Mayor Michael Rama at pito pang opisyal ng Cebu City ng hanggang anim na buwan.

Sa 10-pahinang resolusyon, sinabi ng Office of the Ombudsman na nakitaan nila ng sapat na ebidensiya ng alkalde at pitong opisyal ng dahilan para suspendihin ang mga ito. Kabilang na ang grave misconduct, conduct unbecoming of public officer, conduct prejudicial to the best interest of the service, grave abuse of authority, at violation of the Code of Conduct and Ethical Standards for public officials and employees.

Ang suspensiyon ay nag-ugat sa reklamo ng apat na regular employees ng City Assessor’s Office na nareassign sa iba’t ibang tanggapan ngunit hindi pinasahod at nawalan ng benepisyo mula Hulyo 2023.

Kinilala ang pitong opisyal na sina Collin Rosell, city administrator; Maria Theresa Rosell, officer in charge of the City Assessor’s Office; Francis May Jacaban, designated assistant Department head for Administration/Legal Office; Angelique Cabugao, designated assistant Department head for Operations; Jay-Ar Pescante, designated Administrative Division head; Lester Joey Beniga, designated Assessment of Records Management Division head; at Nelyn Sanrojo, designated Computer Division head.

Tinanggal ang apat na kawani na nagtatrabaho bilang tax mappers at local assessment operations officers na may sahod ng mula P16,000 hanggang P35,000 sa Office of the City Assessor.

Na reassign ang mga ito sa Cebu City Anti-Mendicancy Office, South Road Properties Management Office, Cebu City Operation Second Chance, at Cebu City Environment and Natural Resources.

Base sa desisyon ng Civil Service Commission Regional Office 7, ang reassignment orders ay walang basehan.

Sinabi ni Mayor Rama na wala pa siyang natatanggap na kopya ng resolusyon.

Hindi rin umano pa niya alam ang tungkol sa preventive suspension order.

“Wala pa ko kadawat sa kopya. My lawyers will take care of it,” sabi ng alkalde.