HINDI sana kabigatan ang dagok ng global oil crisis kung inayunan lamang ng Department of Energy (DOE) ang alok na bilateral trade agreement ng Russia limang taon na ang nakakalipas.
Sa isang panayam sa SMNI, hayagang isiniwalat ni Energy Undersecretary Benito Ranque ang matabang na pagtanggap ng DOE sa alok ng Russian counterpart energy department na magbibigay-daan para makapag-ipon ang Pilipinas ng “buffer stock” na pwedeng gamitin sakaling tumaas ang presyo ng mga produktong petrolyo sa pandaigdigan merkado.
Pagtatapat ni Ranque, tinanggihan ni Energy Secretary Alfonso Cusi ang inihaing kasunduang binalangkas ng Philippine National Oil Company (PNOC) at ng gobyerno ng Russia matapos ang pagbisita ni Pangulong Rodrigo Duterte tong 2017.
Nang tanungin kung ano ang naging dahilan ng Kalihim sa pananabla sa bilateral trade agreement, ang tugon niya — “Kasi daw hindi muna siya kinonsulta ng PNOC bago nakipag-usap sa mga Russian counterparts.”
Bagama’t kumbinsido naman aniya siyang walang bansang hindi apektado ng digmaan sa pagitan ng Ukraine at Russia, naniniwala naman umano siyang hindi sana kabigatan ang dagok sa Pilipinas kung napaghandaan ng DOE ang nakaambang krisis sa enerhiya. “Alam naman ng DOE yun.
Malikot talaga ang presyo ng enerhiya. Dapat yan pinaghandaan natin… mas maraming power plants para sa mga kooperatiba sa kanayunan at buffer stock ng langis para di gaanong maramdaman ang epekto sa tuwing gagalaw ang presyo sa global market,” aniya.
Para kay Ranque, hindi makatarungang hayaang magdusa ang mga mamamayan dahil sa kapalpakan ng ilang tao sa pamahalaan, kasabay ng panawagan sa susunod na administrasyon na pag-aralan ang kanyang “immediate, medium at long-term solutions.”
Sa kanya pagtataya, posibleng mapababa ng husto ang singil sa kuryente – P2.50 mula sa umiiral na P11 per kilowatt hour.
“Nasa isinumite kong dokumento sa tanggapan ni President-elect Marcos Jr. ang formula para matugunan ang problemang kinakaharap ng sambayanan.”
Sa ulat ng Economic Times, napunta sa bansang India ang alok ng Russia sa Pilipinas pagkatapos ng pagbisita ni Duterte sa Moscow noong taong 2017. “We literally missed that chance. What Russia was offering then could have allowed us to have buffer stocks which we could use under extreme conditions – like the one we have today,” ani Ranque sa SMNI.
“Consider this… India does not consume much crude oil in their country but it has moved from being an insignificant buyer of Russian crude to the second-biggest destination for shipments, behind only China. Why? Because they saw the necessity to come up with buffer stocks if only to ease the impact of the global oil crisis triggered by the war,” pagtatapos pa ni Ranque.
