SA isang pagsalakay natuklasan ang bultong matataas na uri ng baril matapos isumbong ng misis ang kanyang mister sa pag-aari nitong armas at pampasabog gayundin ang pagmamaltrato sa kanya sa San Juan City.
Bandang ala-1:30 ng madaling araw nitong Biyernes nang salakayin ang bahay ng suspect sa Barangay Balong-Balong.
Dito ay tumambad sa kanila ang mga armas kabilang ang shotguns, assault rifles, pistols, at pampasabog tulad ng Granada. Mayroon ding nakuhang Claymore mines at triggers.
“Hindi namin in-expect na ganto kadami,” sabi San Juan City Police chief Colonel Allan Reglos.
Ang pagsalakay ay bunsod ng reklamo ng misis ng suspect na naka-confine ngayon kasama ang kanyang 3-anyos na anak.
Nagka-trauma na umano ang misis dahil sa pananakot at pananakit ng mister.
“They suffered physical abuse, pati daughter n’ya. Naka-confine po sa isang ospital. Nailahad ng wife kung ano ang mga abuses na nagawa sa kanya. ‘Yun nga po nabanggit doon na tinututukan siya ng firearms, tinatakot s’ya ng mga pampasabog,” sabi ni Reglos.
Hindi naman nagbigay ng pahayag ang suspect.
“We don’t have any statement yet,” ayon sa abogado ng suspect na si Atty. Karlo Marcilla.
Depensa nito, hobby niya lang ang mangolekta ng baril.
“Naka-register sa kanya one firearms lang, wala pa dito. Base din po sa interview sa wife, ay nagbebenta rin po,” dagdag pa ni Reglos.
Nahaharap sa patung-patong na kaso ang suspect gayunin ang kasong droga matapos makuhanan ng isang sachet ng hinihinalang shabu.
Inaalam din ng San Juan Police kung sangkot sa grupo ng gun running ang suspect.
metrosundaily
