NAHULIG ng Philippine Coast Guard (PCG) ang isang barko at tatlong bangka na nagnanakaw ng diesel (fuel pilferage) sa katubigan ng Navotas Fish Port.
Habang nagpapatrolya, namataan ng PCG team ang limang tripulante ng M/V MIROLA 1 na nagsasalin ng diesel sa tatlong bangka na may sakay na 13 tripulante – PALAWAN PIRATES 2022, PALAWAN PIRATES 2023, at PALAWAN PATRICK.
Agad na ininspeksyon ang mga sasakyang pandagat at nakumpirma ang pagsasagawa ng iligal na aktibidad (fuel pilferage).
Humigit-kumulang 20,000 hanggang 30,000 litro ng diesel ang naisalin ng M/V MIROLA 1 sa tatlong bangka nang maaktuhan ng PCG.
Sa pagpapatuloy ng imbestigasyon, nakumpirma rin na walang dokumento ang mga ito.
Napag-alaman pa ng PCG na sangkot din sa fuel pilferage ang tatlong bangka, hindi lamang sa katubigan ng Maynila, kundi pati na rin sa Bataan at Batangas.
Agad na dinala sa Coast Guard Sub-Station Navotas mga sangkot na sasakyang pandagat at mga tripulante nito para sa paghahain ng karampatang kaso.
metrosundaily
