PINASALAMATAN ni Direktor Heneral Arthur Cassanova, ng Komisyon ng Wikang Filipino, ang mga mamamahayag dahil sa papel na ginagampanan nito sa papapalaganap ng ating sariling wika.
Ito ay ipinahayag niya sa isang pulong-balitaan ng Komisyon sa Wikang Filipino na ginanap sa bulwagan ng Philippine Information Agency kahapon, ika-29 ng Hulyo sa lungsod ng Quezon.
Tinuran naman ni Benjamin Mendillo Jr., Komisyoner, Pangasiwaan at Pananalapi ng KWF, na ang media ay ang gulugod sa pagpapayabong ng wika.
Dagdag pa nya, ang mga mamamahayag ay ang padron ng mga kabataan upang maging huwaran sa paggamit ng wikang Filipino.
Kaugnay nito, isinusulong ng KWF ang pagsasaayos ng repositoryo ng ating wika sa pamamagitan ng pagtataguyod ng online version ng mga saliksik, manuscript at dokumentasyon ng komisyon. Sa digital repository, matatagpuan ang mapa ng wika, kung saan nakasaad ang distribusyon ng wika sa buong kapuluaan, diskripsyon ng wika, mga populasyon ng gumagamit ng partikular na wika at iba pang detalye.
Ang naturang hakbangin ay nauugnay sa pang-angkop ng komisyon sa makabagong panahon kung saan halos lahat ay digital na.
Sa pamamagitan nito ay magiging madali at malawakan ang pag-akses ng mga Pilipino, mga eksperto, etnikong grupo na nagmamay-ari ng wika, mga mag-aaral at mga mananaliksik. Ang pulong -balitaan ay pangunahing hakbangin ng Komisyon bilang paghahanda sa pagdiriwang ng Buwan ng Wika ngayong Buwan ng Agosto.
