(Opinion)
MARAMI tayong narinig tungkol sa accountability, para sa flood control projects at sa water services na talagang pinagmumulan ng galit ng maraming tao.
Madaling sabihin na dapat may pananagutan, at totoong dapat may political will na tukuyin ang mga mapang-abuso. Pero ang proseso ng hustisya, hindi lang one-click tapos accountability na agad. Kailangan ayusin ang napakaraming bahagi ng sistema.
Pagdating sa kabataan, marami ang naghihintay ng isang kabuuang youth agenda mula sa administrasyon.
Tayo ay isang napakabatang bansa, at ang mga problema natin ay nakasentro sa mga pangangailangan ng kabataang Pilipino.
Halimbawa: ang out-of-school youth. Ayon sa datos, 25% ng kabataang Pilipino ay hindi nakakapag-aral. Dapat ayusin ang DepEd at dagdagan ang budget para sa classrooms, pero dapat rin pahalagahan yung mga kabataang hindi pumapasok sa paaralan. Marami tayong panukala na tutugon dito, at base sa kanyang mga pahayag, inaasahan natin ang suporta ng administrasyon at mga kaalyado nito.
Ang nakalungkot, marami rin tayong hindi narinig: Tulad ng pagsugpo sa online gambling addiction; ang pagkaroon ng ₱200 wage hike sa gitna ng patuloy na pagtaas ng presyo ng bilihin; ang pagpapahalaga ng West Philippine Sea; at ang pagbalik ng Pilipinas sa International Criminal Court, na hiling ng maraming Pilipino para may pananagutan ang sinumang maglalabis sa kapangyarihan.
Gayunpaman, umaasa kaming masusundan ng gawa ang mga salita ng Pangulo. At sa Kongreso, kasama ang Akbayan Reform Bloc, lalo tayong determinadong maging fiscalizer: upang siguruhin ang pananagutan at tiyakin na walang batang maiiwan.
