INARESTO ng mga operatiba ng Quezon City Police District (QCPD) ang sales supervisor ng nagpapatakbo ng Small Town Lottery sa lungsod makaraang masangkot sa illegal gambling “bookies” ng mga numbers game ng Philippine Charity Sweepstake Office (PCSO).
Sa ulat na nakarating kay QCPD Director, PBrig. Gen. Nicolas Torre III, mula sa District Special Operation Unit (DSOU) na pinamumunuan ni PCol Melgar Devaras, kinilala ang suspek na si Teddy Pasucal, 53, tubong Cebu, at nakatira sa Block 8, Lot 6, Pook Pag-asa St., Barangay Batasan Hills, Quezon City.
Si Pasucal ay sales supervisor ng Lucent Gaming and Entertainment (PCSO STL Authorized Agent Corporation) base sa identification card na nakumpiska sa kanya.
Si Pasucal ay nadakip dakong 10:30PM nitong Setyembre 7, , sa Pook Pag-asa St., Brgy. Batasan Hills, QC.
Ayon kay Devaras, ang pagkakadakip kay Pascual ay tugon sa direktiba ni PNP Chief, Police Gen. Azurin Jr., kaugnay sa kampanya laban sa ilegal na sugal partikular sa paggamit sa mga legal number game ng PCSO tulad ng STL, EZ 2 at lotto bilang prente ng ilegal na sugal sa pamamagitan ng pag-bookies.
Dahil sa pagbu-bookies, malaki ang nawawala sa revenue ng PCSO para sa mga charity program ng ahensya para sa mahihirap.
“Ang estilo nila ay ipinapasok sa iba o sa bookies ang kubranza kaya, malaki ang nawawala sa PCSO dahilan ng mababang revenues,” ayon naman kay PCol. Orteza, QCPD Deputy Director for Administration. Nauna rito, nagsagawa ng anti-illegal gambling ang DSOU sa pangunguna ni PMaj. Don Don M. Llapitan at PLt. Armando N. Penaflor Jr. sa ilalim ng superbisyon ni Devaras, sa Pook Pag-asa, Batasan Hills makaraang makatanggap ng impormasyon na talamak ang operasyon ng bookies sa lugar. Nagresulta naman ang operasyon sa pagkakadakip sa bisor habang suot pa ang ID ng PCSO STL makaraang maaktuhan sa ilegal na pagpapataya para sa bookies. Inaresto si Pasucal dahil sa paglabag sa PD 1602 (as amended by Republic Act 9287(illegal game number, EZ2/lotteng.
Nakumpiska pa kay Pasucal ang gambling paraphernalia tulad ng papelitos, ballpen, at bet money na nagkakahalaga ng P300.00.
Nakatakda naman kasuhan si Pasucal sa Quezon City Prosecutors Office sa paglabag sa PD 1602.
Siya ay nakapiit ngayon sa Kampo Karingal.
Samantala, sa isinagawang Palace briefing kamakalawa, sinabi naman ni Interior and Local Governement (DILG) Sec. Benhur Abalos na kanyang ipaaaresto ang mga indibiduwal na sangkot sa ilegal na operasyon number games ng PCSO tulad ng pagbu-bookies sa STL, lotto, EZ2, Tres Suwertes at iba pa.
Hinikayat naman ni Abalos ang publiko na agad na isumbong sa mga kinauukulan kung may nalalaman silang sangkot sa ilegal na STL upang agad na sugpuin ito.
Itinatag ng PCSO ang STL upang magbigay alternatibong palaro sa mga mamamayan na nahuhumaling sa jueteng at para masugpo ito.
Layunin ng STL ay para makalikom ng dagdag na pondo para sa mga programa ng PCSO gayunman, ang prangkisa ay ginagamit bilang prente ng ilegal na sugal.
